「双非教育城」的现实

「双非教育城」的现实

新界北区的教育,被跨境学童(有当区小学校长指有唔少学童係双非,无具体数据我唔敢讲)拉到资源分薄。本地家长要跨区返学,去年小一派位之中,首三志愿的成功率,同九龙城名校区差唔多,都係64%。

意思即係,北区同九龙城的竞争程度係一样!

好啦,依家统计处预计,将有八万几个额外的双非小学学额需求。点算呢?

政府依家响新界东北新发展区,预留咗一堆土地,作教育用途。总共有15.7公顷。我地假设係以千禧校舍,0.7 作标準,即係接近23间学校。好了,假如我地只係用来做小学,就会有约23,000学额。加加埋埋,都唔够八万个的新增双非加单非小学学额之需求。

我地仲未有呢几幅地的详细规划,依家只係见到,有几幅教育用地都唔细。要物尽其用的话,政府可以将学校重新设计,密度大些,户外空间少些,甚至可以共用设施,将佢搞成一个「学校村」。但係,受制于依家只会容许13,000个跨境学童过关的限制(相信係各口岸的使用量已至极限),所以就要等埋莲塘口岸开放,至有机会放宽多些跨境学童。

唔好忘记,头先只係假设,呢堆新教育用地係用来「招呼」双非,成为「双非教育城」,至可以顶住新增的就学需求,而且仲未有考虑到,本地人口之自然增长。但係,坦白讲,唔响新区搞「双非教育城」,对全港教育学额的压力会更大,因为到时候,双非学童唔响北区返学的话,好可能就会「打散」去其他地方。依家香港有36个校网,部分校网(如96係南丫岛、蒲台岛)係无可能增加学额来迎接双非,又有部分校网,地理上可发展新学校之空间太少,而且学生又不能太密集,恐防返学放学之时,令交通承受巨大压力。

因此,北区、元朗之校网固然「高危」,铁路沿线之学校因为交通便利,相信係取录双非学生的重要地方。加上,如果一下子涌入咁多新学生,旧嘅学校唯有靠一班加多几人,或者就同依家北区小学一样,向隔篱区借学位顶档,应付需求,教学质素又会点呢?

「双非教育城」係一个迫出来的解决方案,唔规划的话,双非学童就要散晒去各校网,本地家长必然大反弹。规划的话,就会变成双非学童集中地,为该区埋下另一个教育地雷。(二之二)

伦敦大学亚非研究学院法律系博士

上一篇:
下一篇: